- Donostian, alokairuek hiru hiruhilekotan jarraian egin dute behera eta 2025eko bigarren hiruhilekotik % 7,8 egin dute behera; Gipuzkoan, bi hiruhilekotan jarraian egin dute behera, % 5,7ko jaitsiera metatuarekin.
- Eraikin kolektiboetako ohiko etxebizitzarako alokairu libreko parkean 87.136 kontratu egin dira, urtebete lehenago baino % 2,6 gehiago. Sasoiko alokairuaren pisua ia egonkor mantendu da 2025eko hiruhileko beraren aldean, eta erregistratutako etxebizitza-kontratu guztien % 3,6 dira —urtebete lehenago % 3,4 ziren—.
- Miguel de los Toyos: “Datuek adierazten dute joera aldatu dela eremu tentsionatuak hedatzen ari diren testuinguruan. Donostian izan diren ondoz ondoko hiru jaitsierak ezohikoak dira Euskal Autonomia Erkidegoko hiriburuen artean, eta beren seriean ez dute aurrekaririk, 2016tik”.
- Gasteizen, kontratu berrien errentak % 4,3 jaitsi dira hiruhilekoan, hilean 814,3 euroraino.
2026ko lehen hiruhilekoan, ohiko etxebizitzarako alokairu libreko kontratu berrien errentak % 2,1 jaitsi ziren Euskadin, 2025eko itxierarekin alderatuta, eta hilean 867,4 eurokoa izan zen batez bestekoa. Beherakada hiru lurralde historikoetan izan da: Arabak % 2,8ko jaitsiera izan du, Gipuzkoak % 2,4koa eta Bizkaiak % 1,0ekoa.
Miguel de los Toyos Etxebizitzako sailburuordeak Alokairu Merkatuaren Estatistika aurkeztu du, Saioa Beistegui Etxebizitzako Plangintzaren eta Prozesu Eragileen zuzendariarekin batera. Saileko Estatistika Organoak egin duen estatistika horrek indarrean dauden kontratuak eta alokairu berrien errentak aztertu ditu.
Euskadiko kontratu berrien batez besteko errenta 889,7 eurokoa izan zen 2025eko hirugarren hiruhilekoan, 885,8 eurokoa laugarrenean eta 867,4 eurokoa 2026ko lehenengoan. Bi jaitsiera izan dira jarraian, eta % 2,5eko jaitsiera metatu da, hileko 22,3 euroren baliokidea.
De los Toyos sailburuordeak “irakurketa baikorra” defendatu du, “zuhurtzia alde batera utzi gabe”: “Datuek erakusten dutenez, Euskadiko alokairu librearen merkatuan joera aldatzen ari da. Hiruhilekoko azken bi behaketei erreparatuta, moderazioa da nagusi, azken urteetako igoera handien ondoren, eta jarraipenari eutsi behar diogu joera finkatzen den egiaztatze aldera”.
2026ko martxoaren 31n, Euskadik eraikin kolektiboetan ohiko alokairu libreko 87.136 kontratu zeuden indarrean, urtebete lehenago baino 2.209 gehiago (+% 2,6). Araban 12.337 (+% 3,3); Bizkaian 43.316 (+% 2,4); eta Gipuzkoan 31.483 (+% 2,6). 2025eko itxiera eguneratuaren aldean, 155 kontratu gehiago daude (+% 0,2).
Erregistratutako etxebizitza-kontratuak, familia bakarrekoak eta sasoiko alokairukoak barne, 92.113 dira. Horietatik 3.294 sasoikoak dira: guztizkoaren % 3,6 —urtebete lehenago % 3,4 ziren—.
Eraikin kolektiboetan indarrean dagoen ohiko etxebizitzaren parkearen batez besteko errenta hilean 807,9 eurokoa da.
Donostian eta Gipuzkoan errenta berriek behera egiten ari dira
Donostian, kontratu berrien errentak jaitsi egin dira ondoz ondoko hiru hiruhilekotan: 2025eko bigarren hiruhilekoan 1.189,4 euro izatetik hirugarren hiruhilekoan 1.173,0 euro izatera, laugarrenean 1.126,2 euro izatera eta 2026ko lehenengoan 1.096,7 euro izatera pasa da. Metatutako murrizketa % 7,8koa izan da, hileko 92,7 euroren baliokidea. Azken hiruhilekoan % 2,6 jaitsi da eta, 2025eko lehen hiruhilekoaren aldean, % 2,9.
Miguel de los Toyos sailburuordeak bilakaera horren irismena nabarmendu du: “Donostian errenta berriek hiru hiruhilekotan segidan izandako jaitsieren sekuentzia ezohikoa da azken hamarkadan Euskal Autonomia Erkidegoko hiriburuetan, eta hirian bertan ez du aurrekaririk seriea 2016an hasi zenetik”.
Donostian indarrean dagoen parkeak 9.801 kontratu ditu, urtebete lehenago baino 95 gehiago (+% 1,0), nahiz eta 2025eko itxieran baino 13 gutxiago erregistratu.
Gipuzkoako kontratu berriek 870,3 euroko batez besteko errenta dute, aurreko hiruhilekoan baino % 2,4 txikiagoa. Bi jaitsiera izan ditu ondoz ondo, eta % 5,7ko jaitsiera metatu du 2025eko hirugarren hiruhilekotik.
Erreferentzia-indizeak 2025eko urriaren 1etik aurrera aplikatzen dira Gipuzkoako eremu tentsionatuetan.
Bizkaiko errenta berriek % 1,0 egin dute behera eta alokairu-parkea handitu da
Bizkaiko kontratu berriek 898,7 euroko batez besteko errenta dute, aurreko hiruhilekoan baino % 1,0 txikiagoa. Indarrean dagoen parkeak 43.316 kontratu ditu, urtebete lehenago baino % 2,4 gehiago.
Bilbok 16.212 kontratu ditu indarrean, urtebete lehenago baino 374 gehiago (+% 2,4). Alokairu berrien errenta 1.006,2 eurokoa da, aurreko hiruhilekoa baino % 0,5 handiagoa —urte artekoan % 7,1 egin du gora—.
Erreferentzia-indizeak 2026ko apirilaren 21ean hasi ziren aplikatzen Bizkaian, aztertutako hiruhilekoaren ondoren.
Araban eta Gasteizen errenta berriek behera egin zuten aurreko hiruhilekoarekin alderatuta
Arabak 783,4 euroko batez besteko errenta du kontratu berrietan, 2025eko laugarren hiruhilekoan baino % 2,8 txikiagoa. Gasteizen batez bestekoa 814,3 eurokoa da, hiruhileko artean % 4,3ko murrizketa izan ondoren, hau da, hilean 36,4 eurokoa. Urte arteko terminoetan, errentak % 3,6 igo dira lurraldean eta % 2,5 hiriburuan.
Gasteizek 10.190 kontratu ditu indarrean, urtebete lehenago baino 294 gehiago (+% 3,0).
Araban, erreferentziazko indizeak 2026ko apirilaren 21ean hasi ziren aplikatzen, aztertutako aldiaren ondoren.
Udalerri tentsionatuetako bilakaera
Saioa Beisteguik udalerri tentsionatuen bilakaera eguneratu du, irakurketa estatistikoa egiteko behar besteko erregistroekin, eta errenta berriak eta indarrean dagoen parkea bereizi ditu.
Errenteriak 763,7 euroko errenta izan du kontratu berrietan, hiruhileko arteko % 5,0eko jaitsierarekin eta urte arteko % 7,7ko jaitsierarekin. Irun 805,5 eurotan kokatu da, % 4,9ko eta % 3,9ko jaitsierekin, hurrenez hurren. Indarrean dauden parkeak handitu egin dira: 26 kontratu gehiagorekin (+% 1,6), guztira 1.696 izatera iritsi arte, eta 67 gehiagorekin (+% 2,1), guztira 3.194, 2025eko martxoarekin alderatuta.
Tolosak 770,2 euroko errenta du, hiruhileko artean % 2,8 gehiago eta urte artean % 11,1 gehiago; parkeak 946 kontratu ditu, urtebete lehenago baino 12 gehiago (+% 1,3). Barakaldokoa 836,7 eurokoa da, hiruhileko artean % 1,3ko eta urte artean % 7,7ko igoerekin; 4.014 kontratu daude indarrean, urte artekoari erreparatuta 129 gehiago (+% 3,3).
Hiru hilean behin errentak argitaratzen ez diren lekuetan, jarraipena indarrean dagoen parkean egiten da. Urte arteko terminoetan, Zumaiak 20 kontratu gehiago ditu (+% 5,1), guztira 415; Astigarragak 12 gehiago (+% 3,9), 323 guztira; Usurbilek 13 gehiago (+% 6,0), 228 guztira; Hernanik 22 gehiago (+% 2,8), 800 guztira; eta Lezok 9 gehiago (+% 4,0), 233 guztira. Lasarte-Oriak, aldiz, 802 erregistratu ditu, bat gutxiago (−% 0,1).
Galdakaon 735 kontratu daude indarrean, urte arteko terminoetan lau gehiago (+% 0,5). Zifra hori udalerri osoari dagokio, eta eremu tentsionatuaren izendapenak 2. barrutiari besterik ez dio eragiten.
2026a baino lehen, zenbait udalerrik indarrean zuten eremu tentsionatuko adierazpena: Errenteriak (2025eko urtarrilaren 31n), Lasarte-Oriak, Zumaiak, Irunek eta Barakaldok (maiatzaren 1ean), Donostiak eta Galdakaoko 2. barrutiak (uztailaren 30ean) eta Astigarragak, Usurbilek, Bilbok eta Gasteizen adierazpena jaso zuten esparruak (urriaren 31n). Hernani, Lezo eta Tolosa 2026ko otsailaren 3an batu zitzaizkien, eta hiruhilekoa amaitzean 14 udal eremuk zuten indarrean adierazpena, BOEn argitaratu ondoren.
Eusko Jaurlaritzak Pasaia, Zestoa eta Arrasate ere eremu tentsionatuen adierazpena eman zien hiruhilekoan, baina 2026ko apirilaren 28an jarri ziren indarrean, BOEn argitaratu ondoren. Martxoan, Pasaiak 883 kontratu erregistratu zituen indarrean (urte arteko terminoetan +% 3,0); Zestoak 116 (+% 7,4); eta Arrasatek 750 (+% 11,3). Azken horretan, errenta berria 752,7 eurokoa da (hiruhileko arteko terminoetan +% 1,5 eta urte arteko terminoetan +% 6,5). Horrenbestez, adierazpen horren aurreko datuak dira.
Emaitzak interpretatzean, adierazpen-datak eta indizeen aplikazioa kontuan hartu behar dira, aldakuntza oro neurri bakar bati modu automatikoan egotzi gabe.
Bizigunek 7.523 etxebizitzarekin itxi du lehen hiruhilekoa, urtebete lehenago baino % 0,7 gehiago
Bizigunek 7.523 etxebizitzarekin itxi du martxoa, 2025eko itxieran baino 24 gehiago (+% 0,2) eta urtebete lehenago baino 52 gehiago (+% 0,70): 840 Araban, 4.605 Bizkaian eta 2.078 Gipuzkoan. Hiru hiriburuetan 1.776 dira, urte arteko terminoetan % 2,31 gutxiago.
Amaitzeko, De Los Toyos sailburuordeak aditzera eman duenez, “errenta berrietan azkenaldian izan diren jaitsierekin lotuta, etengabeko jarraipena egin behar zaie alokairu-parkeari eta udalerrien arteko aldeei. Sailak eremu tentsionatuen eta erreferentziazko indizeen ebaluazioari eutsiko dio, alokairu eskuragarriagoa sustatzearekin eta Bizigune gisako programen bidez etxebizitza mobilizatzearekin batera”.
Informazio gehiago Irekia atarian (Leiho berrian irekiko da)
